Нийгмийн сүлжээнд 17 настай, эмэгтэй Э-г удаа дараа алгадаж, хөлөө үнсүүлж “Би чамд хайртай” гэж хэлүүлэн тохуурхаж байгаа бичлэг өнгөрсөн долоо хоногт цацагдсан билээ.
Бичлэг олон нийтийн сүлжээнд цацагдсан даруйд хууль, хяналтын байгууллагаас дээрх хэргийг шалгаж, тухайн эмэгтэйд бие махбодын хүчирхийлэл үйлдсэн дөрвөн хүнийг тогтоон, хэргийг шалгаж эхэлсэн юм.
Энэ талаар ЦЕГ-ын Хэвлэл мэдээллийн төвийн дарга, хурандаа Б.Баатархүү “Цахим орчинд түгсэн эмэгтэйчүүд нэгнийгээ дээрэлхсэн гэх хэргийг Багануур дүүргийн Цагдаагийн хэлтсээс шалгаж эхэлсэн. Уг бичлэгт иргэн Э-г дээрэлхэж байгааг тогтоосон” гэх тайлбарыг хэвлэлийнхэнд өгсөн байдаг.
Тэгвэл эл хэрэгт сэжигтнээр татагдсан дөрвөн эмэгтэйг ШШГЕГ-ын харьяа Цагдан хорих 461 дүгээр ангид саатуулан, шалгаж эхэлжээ.
Учир нь, тухайн эмэгтэйчүүд нийлж 17 настай Э-гийн биеийг үнэлүүлж байсан байж болзошгүй талаар баттай эх сурвалж мэдээллээ.
Тиймээс хуулийн байгууллагаас эл хэргийг зохион байгуулалттай гэмт хэрэг хэмээн үзэж, гэмт этгээдүүдийг цагдан хориод байгаа аж.