Манай улс хоёрдугаар сарын 23-наас коронавирусийн халдварын эсрэг вакцинжуулалтыг эхлүүлсэн. Үүнээс хойших хугацаанд нийт 311 мянга гаруй хүнд коронавирусийн эсрэг вакцины эхний тунг хийгээд байгаа юм.
Эдгээр иргэний 532 нь коронавирусийн халдварт цар тахлаар өвчилснийг Засгийн газрын Хэвлэл мэдээлэлтэй харилцах газрын дарга Ц.Ганзориг өөрийн цахим хаягтаа бичжээ.
Тэрбээр “310 мянга гаруй хүн вакцинд хамрагдаж байгаа ч сэрэмжлүүлэх мэдээ байна. Вакцины эхний тунг хийлгэсэн 532 хүн халдвар авсан. Эхний тунг хийлгээд 14 хоноод 40-50 хувийн дархлаа тогтож буй. 2 дахь тунг хийлгээд мөн 14 хоноод бүрэн дархлаатай болно.
Вакцины 2 тунг тариулсан ч маскаа тогтмол зүүж, зайгаа барьж, халдвар хамгааллаа барихыг мэргэжлийн хүмүүс зөвлөсөөр байна.
Эрсдэлтэй орчинд бүү бай. Халдвар авсан иргэдийн 30 гаруй хувь нь ажлын газраасаа авч буй тул анхаарна уу! Хамт олноороо тамхилахгүй байхыг, масктайгаа байхыг анхааруулж байна.
Дөрөвдүгээр сарын 3-наас вакциныг 2-3 дахин эрчимжүүлж, ААН-үүдийг 15 хоног хязгаарлаж буй нь вакцинжуулалтыг үр дүнд хүргэх нэг үндэслэл юм.
Улаанбаатар хотын насанд хүрсэн 1 сая иргэнээ дөрөвдүгээр сард вакцины эхний тунг хийж, тавдугаар сараас орон нутагт, мөн нийслэлийн иргэдийг хоёр дахь тунг хийж дуустал, цаашид сэрэмжээ алдахгүй байхыг уриалж байна. Та бид КОВИД-19 халдвартай зэрэгцэн амьдарч буйг нэг хором ч бүү март” гэжээ.
