Байгаль орчин, аялал жуулчлалын сайдаар томилогдоод удаагүй байгаа Б.Бат-Эрдэнэ өөрийнхөө төрсөн аавд 40 сая төгрөгийн үнийн дүнтэй тендер өглөө гэдэг мэдээлэл манай сайтад ирлээ.
Уг мэдээллийн дагуу төрийн худалдан авах ажиллагааны цахим систем tender.gov.mn сайт руу орж шалгахад БОАЖ-ын сайдын эрхлэх асуудлын хүрээнд хамаардаг Усны газраас зарласан нийтдээ 50,000,000 төгрөгийн төсөвт өртөгтэй “Улз голын тээгийн боомтын байгаль орчны нарийвчилсан үнэлгээ судалгаа хийх” гэсэн тендерт “Итгэлт төгөл” ХХК шалгарсан байв.
“Итгэлт төгөл” ХХК-ийн талаар төрийн нээлттэй мэдээллийн сангаас шүүрдэж үзэхэд гүйцэтгэх захирлаар нь Цагаачийн Бат-Өлзий хэмээн бичээстэй байгааг та бүхэн харж байна.
“Итгэлт төгөл” ХХК-ийн захирал Ц.Бат-Өлзий бол хөрс, агрохимийн ухааны доктор бөгөөд БОАЖ-ын сайд Б.Бат-ЭрдэниЙн аав мөн гэдгийг эх сурвалж батлан хэллээ.
Мэдээллийг нягтлах үүднээс “Итгэлт төгөл” ХХК-ийн захирал Ц.Бат-Өлзий гуайн 911911** дугаарын утас руу залгаж асуухад “Би Итгэлт төгөл ХХК-ийн захирлаар ажиллаж байсан нь үнэн. Би 2022 оны нэгдүгээр сарын 19-ний өдөр группынхээ захиралд албан ёсоор ажлаас чөлөөлөгдөх өргөдлөө өгч тэтгэвэртээ суусан. Тус компанитай ямар ч хамааралгүй” гэх хариуг өглөө.
“Итгэлт төгөл” ХХК нь байгаль орчны үнэлгээний чиглэлээр сүүлийн 5 жилийн хугацаанд 40 гаруй тендерт оролцсон боловч бүгдээс нь мултарч байжээ.
Харин БОАЖ-ын сайдаар Б.Бат-Эрдэнэ томилогдсоноос хойш ердөө хоёрхон сарын дараа БОАЖ-ын сайдын эрхлэх асуудалд хамаарах Усны газраас зарласан тендерт материалаа өгөөд шууд шалгарсан байгаа нь анхаарал татаж байна.