Шадар сайд С.Амарсайханы ах С.Отгонбаярын охин О.Энэрэл нөхөртэйгээ олон жил ханилсны дараа гэр бүлийнхээ үүсгэн байгуулсан “Зайсан Хилл” цогцолбортоо хуримаа даруухан ёслоод өнгөрчээ. Өдгөө хүүхдүүдийн аав, ээж болсон О.Энэрэл нөхөртэйгээ хуримаа жилийн ойн дээрээ ийнхүү ёсолсон байна.
Хувцас загварын худалдаа, хувь хүний имиж бүрдүүлэлтийн чиглэлээр үйл ажиллагаа явуулдаг InnovStyle компанийг үүсгэн байгуулсан О.Энэрэл хувцас загварын ертөнцөд боломжийн үнэ, гоёмсог дизайнаараа цахиур хагалж буй Charles & Keith брэндийг албан ёсоор Монголд оруулж ирсэн. Лондон хотод их сургуулиа маркетингаар дүүргэсэн тэрээр өмнө Karen Millen компанид стилистээр, Оюуны Ундраа группд бизнес, маркетингийн чиглэлээр ажиллаж байсан туршлагатай. Мөн “Миний хувийн стилист” номын зохиогч билээ.
Өдгөө “Оюуны Ундраа”-гийн босс, УИХ-ын гишүүн, Онцгой байдлын сайд асан С.Отгонбаяр нам гүм амьдарч, хүү охин нь олны анхааралд орж ирсэн. Хүү О.Тэнүүн нь Ерөнхийлөгчийн хүргэн болсон бол охин О.Энэрэл нь Шангриллад хувцасны дэлгүүр нээж, стилистээр ажилласаар байна. О.Энэрэл дуучин Т.Ариунаагийн стилистээр хэсэг ажилласан. Аав нь экс гишүүн, Онцгой байдлын сайд асан, Монголын толгой баячуудын нэг, авга ах нь Хотын даргаас Шадар сайд болж, харин төрсөн ганц ах нь ерөнхийлөгч Х.Баттулгын хүргэн, гэр бүлээрээ Зайсанг “эзэгнэсэн” болохоор О.Энэрэл “ар тал” сайтай нэгэн билээ.
