УИХ-ын Хүний эрхийн дэд хороо зэвсэгт хүчинд цэрэг удаа дараа амь хохирсон асуудлыг нээлттэй хэлэлцэж байна.
Үүгээр дэд хорооны гишүүд асуулт асууж, хариулт авч байна.
Энэ үеэр Батлан хамгаалахын сайд Г.Сайханбаяр: “Цэрэг дэглэлтийг болиулах чиглэлээр дараах арга хэмжээг авч ажиллахаар төлөвлөөд байна. Юуны түрүүнд офицеруудын ёс зүйн түвшнийг тогтооно. Хоёрт , Батлан хамгаалах яамны дэргэд цэрэг дэглэлтийг болиулах иргэний зөвлөл байгуулна. Энэ зөвлөлд нийгмийн үлгэр болсон хүмүүсийг оруулна. Мөн яамны дэргэд 24 цагийн нээлттэй утас ажиллуулж эхэлсэн. Түүнчлэн хуульч, сэтгэл зүйч нарын бүлэг томилж, бүх цэргийн анги дээр ажиллуулна ” гэж ярилаа.
Харин УИХ-ын гишүүн Н.Алтанхуяг “Д.Ганзориг гэдэг хүний хандлагаар бол зэвсэгт хүчин өөдлөхгүй юм байна. Ганц удаа хуралдаад өнгөрөх биш анхаарал тавиад ажилламаар байна. Батлан хамгаалах юм уу Жанжин штабын бүлэглэл дээр утас ажлаад нэмэргүй.
Ажлын хэсэг байгуулна, сэтгэл зүй ч ажиллана гээд яах вэ? Гэмтэл учруулж, хүн хөнөөсөн хүмүүст ямар хариуцлага хүлээлгэсэн юм бэ? Хохирогчид олон байгаа. Өмнө нь хэнийг ямар байдалтай болгосон хүмүүст ямар шийтгэл оногдуулсан юм бэ гэдгийг ил болгох хэрэгтэй. Бага дарга хүн зодоход байшин, мөнгө ямар хэрэгтэй юм бэ?” гэдгийг тодруулав.