Дөрөвдүгээр сарын 11-ний ням гарагийн орой иргэн Б.Сүндэръяа өөрийн нүүр хуудаст “Тэр УИХ-ын гишүүний нэрийг хэлэх үү, яах уу” нэртэй бичвэр нийтэлсэн. Удалгүй тэрбээр ЦЕГ-т гомдол гаргаж, Ц.Анандбазарын нэрийг албан ёсоор зарласан. Ц.Анандбазар бэлгийн дарамт үзүүлж байсан гэх 1000-аад бүсгүй хандсан талаар мэдэгдээд байна.
Түүнчлэн УИХ-ын гишүүн Ц.Анандбазарын дарамт, хүчирхийлэлд өртөж байсан охидыг зоригтой байхыг уриалж, бусармаг үйлдлийг нь илчилсэн захидлыг цуглуулах ажлыг “Me too” хөдөлгөөний хүрээнд өрнүүлж эхэлсэн.
Ц.Анандбазар иргэн Б.Сүндэръяаг танихгүй уулзаж байгаагүй хэмээн тус хөдөлгөөнд нэгдэж байгаагаа илэрхийлээд амжсан.
“Me too” хөдөлгөөнөөс Ц.Анандбазарыг эргүүлэн татаж, хууль хяналтын байгууллагад шалгуулан буруутай эсэхийг нь тогтоолгох шаардлагыг УИХ-ын дарга Г.Занданшатар, Ёс зүй, сахилга хариуцлагын байнгын хорооны дарга Б.Бат-Эрдэнэ, УИХ дахь хүчирхийллийн лобби бүлэг, Эмэгтэйчүүдийн бүлэг, Хүний эрхийн үндэсний комисст хүргүүлсэн байна.