Наадмын ногоон дэвжээнээ уран хурц барилдаанаараа бөхийн хорхойтнуудыг баясгаж байсан улсын харцага Г.Ганхуяг өдгөө улсаа төвхнүүлэх их үйлсэд зорьж явна. Хөвсгөл аймгийн Галт сумын харьяат Монгол Улсын харцага Г.Ганхуяг “Босоо хөх Монгол” төрийн бус байгууллагын тэргүүнээр өнгөрсөн онд сонгогдсон. Тэрбээр энэхүү албыг хүлээн аваад “Улс эх орны язгуур эрх ашиг, тусгаар тогтнол, газар нутгийнхаа бүрэн бүтэн байдлын төлөө бурууд ташуур, зөвд дэм болж ажиллана. Цаг үеийн шаардлагаар бие биедээ итгэж эвсэж нэгдсэн бид зарим хүмүүсийн дээрэмчин, рекетчин, эрүүгийн элементүүд байдаг гэсэн ойлголтыг зөвөөр таниулж, монгол бөхийн нэр төрөөр хүндлэгдэх түвшинд ажиллана” хэмээн амласан. Тиймдээ ч амлалтаа биелүүлэхээр идэвхтэй тэмцэж яваад нь урам өгч, алга ташиж, андын тэврэлт илгээгээрэй ард түмэн минь.
