Нүүрний төрх, хамар, уруул, нүд гээд л бүх зүйлээрээ ээжийнхээ залуу насыг санагдуулам үзэсгэлэнт бүсгүй бол Mrs М. Тэрбээр О.Энхтуулын том охин. 14 настайдаа ээжийг дагаж Герман улсыг зорьж, тэндээ найз нөхөд байхгүй учраас өдрийг ганцаараа өнгөрүүлэхдээ өөрийгөө нээж дуу хөгжим оролдож эхэлсэн гэдэг. Дараа нь эмээгээсээ нуугдаж урлагт орох хэрэг гарсан. Эмээ нь урлагийн хүн болгохгүй, хуульч болгоно гэдэг байсан учраас анхны дуугаа олон нийтэд цацахдаа үсээ буржийлган, нүүрээрээ цааш харан дуулж клипжүүлэх шаардлага гарсан. Тамир нэрээрээ гараад ирвэл эмээ нь таничих учраас бодож байгаад Mrs M хэмээх нууцлаг нэрийг олсон юм байна. Урлагт тэр чигтээ шингэчихнэ гэж бодоогүй, анхны ганц уран бүтээлээ зөвхөн өөртөө зориулчихъя гэж байсан ч өдгөө тэрбээр Монголын репперийн хатан хаан шахуу залууст үнэлэгдээд байгаа билээ. Саяхан төрсөн, жаахан хүүхэдтэй гэхэд үзэсгэлэнтэй байгаа биз. Улам их амжилт хүсье.
