Хүмүүнд амьдрал бэлэглэх шиг сайхан зүйл хаана байх вэ. “Макс” группийн эзэн Д.Ганбаатар, гэргий Д.Уянгалянхуа нар үе үе чимээгүйхэн буян хийдэг. Энэ жишгээр тэд саяхан төрийн албанд гэр бүлээрээ 30 гаруй жил зүтгэсэн ч өвчинд шаналсан өрхийн тэргүүнийг эмчлэх аянд нэгдэн, өөрсдийн бий болгосон “Макс” угшлын хурдан удмын адуугаараа хандивт өргөсөн байна. Цагдаагийн албанд чин сэтгэлээр 30 орчим жил зүтгэсэн нөхөр Гансүх нь 4 жилийн өмнө бөөрний хавдараар огошлогдон, БНСУ-д эмчлүүлэн эдгэсэн ч саяхан элэг рүү нь үсэрхийлсэн мэдээтэй байжээ. Хэзээ ч шантарч үзээгүй дайчин гэр бүл Турк руу шинжилгээгээ явуулахад 80 хувийн найдвар амласан байна. Олон сайхан найз нарынхаа буянд хандивын тоглолтыг 4000 үзэгчтэй хийж, мөн найзуудынхаа санаачилсан хурдан удмын морьны сугалааг явуулж мөнгө босгоход сайхан сэтгэлт “Макс” группийн эзэд дэм өгөн, хурдан буянаасаа өгч, амьдрал бэлэглэсэн байна. Баруун аймагт хувийнхаа хөрөнгөөр зам тавьж, хоёр гурван өдөр явдагийг хоёр гуравхан цаг болгон товчилж монголчууддаа буян хийсэн “Макс” группийн эзэн Д.Ганбаатар бол эх орондоо байтугай дэлхийд хурдан мориороо гайхагдсан хүн. Иймдээ ч Д.Ганбаатарын хурдан буянгаас хандивын сугалаанд бэлэглэнэ гэсэн чимээнээр сугалааны борлуулалт ч шуураад ирсэн байна. Аргагүй л хоншоортой, буянтай аавынх хүү, ээжийн охин гэсэндээ явсан газар, далайсан гар бүхэн нь бусдад амьдрал, аз жаргалын оч бэлэглэх юм даа.
.
