Дуучин Нара буюу М.Нарантуяагийн санаачилсан “Me too Mongolia” хөдөлгөөний залуус УИХ-ын гишүүн, МАН-ын гишүүн Ц.Анандбазарыг хүчирхийллийн асуудалд холбогдсон учир УИХ-ын гишүүний бүрэн эрхээсээ түтгэлзэж, хууль ёсны байгууллагаар зохих ёсоор шалгуулахыг шаардсан албан бичгийг У.Хүрэлсүхэд хүргүүллээ. Хүргүүлсэн албан бичгийн шаардлагын хариуг долоо хоногт багтаан өгөхгүй бол тэмцлийн дараа дараагийн хэлбэрт шилжихээ тус хөдөлгөөний зүгээс мэдэгдээд буй.
Уг албан шаардлагад:
“МУ-ын Ерөнхийлөгчийн ээлжит сонгууль дөхсөн энэ үед эрх баригч намын удирдлага болон УИХ дахь МАН-ын бүлгийн шийдвэр нь МАН-аас сонгогдсон УИХ-ын гишүүний гэм буруутай үйлдэлд халхавч болохгүй, иргэдийн шаардлага хүсэлтийн дагуу алхам хийж, хуулийн өмнө бүгд ижил, тэгш байх Үндсэн хуулийн үзэл баримтлалыг биелүүлж чадах эсэх дээр иргэдийн ажиглалт, хүлээлт өндөр байгаа талаар хөдөлгөөнд нэгдсэн 30 мянга гаруй гишүүдийн цахим хуудсанд идэвхтэй ярилцаж байна.
Иймээс нийгэмд хүн засагладаг биш хууль засагладаг байлгахын тулд МАН-ын гишүүн, УИХ-ын гишүүн Ц.Анандбазарыг УИХ-ын гишүүний эрхээс түдгэлзүүлэх хууль хяналтын байгууллагаар яаралтай шалгуулах ажлыг шуурхайлан хамтран ажиллана уу” гэсэн байна.