Үндсэн хуулийн цэцийн дарга Д.Одбаярт холбогдох асуудлыг Цэц хаалттайгаар хэлэлцэж байна. Тэрбээр БНСУ-д ажлын айлчлал хийгээд буцах үедээ онгоцны үйлчлэгч эмэгтэйн биед хүрч бэлгийн дарамт учруулсан хэргээр шийтгүүлж, торгуулсан. Мөн тодорхой хугацаанд хилийн хориг тавиулаад байсан Д.Одбаяр өнгөрсөн долоо хоногийн сүүлчээр эх орондоо ирсэн билээ. Ирэнгүүтээ албан тушаалаасаа чөлөөлөгдөх хүсэлтээ гаргасан боловч, өнгөрөгч даваа гаригт хэлэлцэхээр тов нь гарсан хуралдаанд өөрийн биеэр ирээгүй юм. Харин түүнийг биечлэн оролцуулахыг ҮХЦ-ийн гишүүд санал гаргасан бөгөөд ирц хүрээгүй гэдэг шалтгаанаар хурал хойшилж, Цэцийн нийт гишүүдийн өнөөдрийн хуралдаанаар авч хэлэлцэхээр товлосон. ҮХЦ-ийн даргын албан тушаалаа өгөх хүсэлт гаргасан Д.Одбаярын өргөдлийг Цэцийн гишүүд нухацтай хэлэлцэх шаардлага байгаа хэмээн үзэж, хуралдааныг хаалттай горимоор хийхээр болжээ. Яг одоо Д.Одбаярын асуудлыг Цэц хаалттайгаар хэлэлцэж байгаа бөгөөд хуралдаанаас гарах шийдвэрийг нийтэд мэдээлэх юм байна.
