Өчигдөр буюу тавдугаар сарын 21-ний өдөр, оройн 18.00 цаг орчимд БШУ-ны сайд Л.Энх-Амгалан гаднын халдлагад өртсөн тухай бид өмнө мэдээлсэн.
Тодруулбал, 18.00 цагт тус яамны нэг давхарт “Залуус-Хөгжлийн түүчээ” олимпиадад шилдэг байранд шалгарсан сурагчдад шагнал гардуулах ёслолын өмнөхөн Л.Энх-Амгалан сайд рүү хутга далайсан этгээд халдсан аж. Эх сурвалжийн мэдээлснээр тухайн этгээд нь 37 настай Д.Совд гэгч бөгөөд түүнийг өдгөө Сүхбаатар дүүрэг дэх цагдаагийн нэгдүгээр хэлтэст “Бусдын биед халдахыг завдсан” гэх шалтгаанаар саатуулан шалгалтын ажиллагааг эхлүүлсэн юм.
Эх сурвалжийн мэдээллээр: Л.Энх-Амгалан сайдын биед халдахыг завдсан Д.Совдыг ШШГЕГ-ын харьяа хорих 461-р ангид саатуулжээ. Тэрбээр цагдаагийн байгууллагад өгсөн мэдүүлэгтээ “Л.Энх-Амгалан сайдыг айлгахын тулд халдсан” гэж мэдүүлсэн байна.