Сэлэнгэ аймгийн Ерөө сумын Бугант багийн Байшинт уулын “Хотгойн рашаан” гэдэг газар 17 хүн самар түүж отогт байрлаж байсны зургаа нь явганаар хүнсэнд явсан байжээ. Отог руугаа буцах замдаа дээрх иргэдийн хоёр нь бие ядарсан хэмээн үлдсэн байх ба нэг иргэний цогцос олдож, нөгөөх нь сураггүй алга болсон тухай дуудлага цагдаагийн байгууллагад ирсэн байна.
Улмаар аймгийн Онцгой байдлын газар, Цагдаагийн газрын алба хаагчид, Хан Хэнтий тусгай хамгаалалтын газрын ажилтнууд, орон нутгийн иргэд эрэн хайх ажиллагааг зохион байгуулахад, сураггүй болсон гэх нэг иргэн нь өөр отгоос эсэн мэнд олдсон байна.
Харин дээрх иргэнийг хайхаар явсан хоёр хүн зургаадугаар сарын 12-ны өдөр мөн отгоосоо гарч сураггүй байсан тул албаныхан дахин эрэн хайх ажиллагаа явуулж, өчигдөр буюу зургаадугаар сарын 20-ны өдөр аймгийн төвөөс 360 км зайд байх Байшинт- Уул гэдэг газраас эсэн мэнд олжээ.