ЦЕГ-ын Хар тамхитай тэмцэх газрын дарга, хурандаа Ж.Эрдэнэболд манай улсад хар тамхины хэрэглээ ямар нөхцөл байдалтай байгаа болон энэ төрөлд үйлдэгдэж буй гэмт хэргийн тоо, авч байгаа арга хэмжээний талаар сэтгүүлчдэд мэдээлэл өглөө.
Тэрбээр ”2019 оны эхний есөн сарын байдлаар мансууруулах болон сэтгэцэд нөлөөлөх эм, бэлдмэлтэй холбоотой 193 хэрэгт 333 хүн холбогдон шалгагдаж байна. Үүний 23 хэрэг нь хөдөө орон нутагт бүртгэгдсэн. Үүнээс харахад энэ төрлийн хэрэг зөвхөн Улаанбаатарт биш хөдөө орон нутагт ч гарч байна. Нийт хүний 282 нь буюу 85.4 хувь нь 18-35 насы залуучууд байгаа бол нийт холбогдогчдын дотор 13 сурагч, дөрвөн төрийн албан хаагч байна. Шуудан илгээмж ашиглан гадны орнуудаас Монгол Улс руу хар тамхи, мансууруулах бодис нэвтрүүлэх гэсэн 11 хэргийг илрүүлэн шалгаж байна” гэв.