Орос гуравдугаар сургуулийн гадна эцэг эхчүүд жагсаж, өөрсдийн байр сууриа илэрхийлээд байна. Иймд БШУЯ-ны гадна 300 гаруй эцэг эхчүүд цугларсан байна. Учир нь Нууц.мн сайтын эрхлэгч Г.Будрагчаа Орос гуравдугаар сургуулийн захирал Ж.Соронзонтой холбогдох хэргийн талаар баримттай эрэн сурвалжилсан цуврал нэвтрүүлгийг бэлтгэж, АТГ-т шалгуулах өргөдлөө өгч хууль хяналтын байгууллагаар шалгуулаад байгаа юм.
Эцэг эхчүүдийн төлөөлөл хэвлэлийнхэнд хандан хэлэхдээ “Авилгачдын хүүхдүүд Орос гуравдугаар сургуульд сурдаг гэж биднийг гүтгэж байна. Энэ сургуульд 2700 хүүхэд сурдаг. Эцэг, эхчүүд бид Ж.Соронзон захирлын талд зогсоно. Хэрэв Ж.Соронзон захирал ажил албаа явуулахдаа асуудалгүй байсан бол бид жагсахгүй. Алтыг барьж үзээгүй хүн алтыг мэдэхгүй. Бид хүүхдээ сургаж байгаа учраас энэ сургуулийг шилдэг гэдгийг сайн мэднэ.
Хамгийн гол нь сэтгүүлч Г.Будрагчаагийн хэлээд байгаа авилга авдаг гэх асуудлаар өнөөдөр жагссангүй. Зөвхөн хүүхдүүдийн маань сурч буй сургуулийн удирдлага солигдох, удирдлагагүй болох асуудлыг хөндөн жагсаж байна.
Ж.Соронзон захирал олон жил зүтгэж ажилласны хүчинд хүүхдүүд маань өдрийн хоёр хоолтой, чанартай боловсрол эзэмшиж байна. Соронзон захирлыг байхгүй болчихвол бид хүүхдүүдээ шилжүүлнэ” гэлээ.