Үндэсний цэцэрлэгт Хүрээлэнгийн захирлаар дөрвөн жил ажиллаж үзсэн Ш.Сайхансамбуугийн охин С.Эрдэнэтуул улс төрөөс холдсон уу гэмээр нам жим таг чиг болсон. Аав нь “Нарантуул” Олон улсын худалдааны төвийн эзэн, Өөрөө”Баялаг Ундраа” худалдааны төвөө ажиллуулдаг хойно түүнд хийх ажил, явах газар мундахгүй их биз. Тиймдээ ч Монголын улс төртэй, төргүй С.Эрдэнэтуул цааш явах нь тодорхой, хоолтой хонох нь ойлгомжтой.
Баянзүрх дүүрэгт МАН-аас ИТХ-д нэр дэвшин дөрвөн жил ажиллаж үзсэн С.Эрдэнэтуул уг нь сэтгэл сайтай, хичээнгүй бүсгүй хэмээн тойргийнхон нь ярьдаг байсан. Харин өнгөрсөн сонгуулиас хойш намдаа, улс төрын хорчингуудад нам даруулж, дахин нэр дэвшиж ч амжаагүй. Түүний аав Ш.Сайхансамбуугийн тухайд “Үнэн ба Зөв” намыг үүсгэн байгуулж, Отгонбаатар хэмээх погдгор нөхрийг чамгүй сайн санхүүжүүлэн дэмжсэн ч өнөөх нь давралыг буруу аваад цаашдаа өөрийгөө бүх юмны эзэн гээд бодчихсоноос болж тэдний хагарал эхэлсэн гэдэг. Ийнхүү тэдний гэр бүлийн улс төрийн амьдрал дуусгавар болсон юм уу даа.
С.Эрдэнэтуул нь Үндэсний цэцэрлэгт Хүрээлэнгийн захирлаар ажиллаж байхдаа амралт, зугаалгын газрыг Нарантуул зах шиг болголоо гэдэг шүүмжлэлд нэлээн өртөж байсан. Үндэсний цэцэрлэгт хүрээлэнд наймаа хийх боломжийг зарим иргэдэд олгосонтой холбоотой ийм шүүмж гарсан. Мэдээж ажил хийхэд алдаа оноо гарна, ахиулж давуулж л харж явах нь хамгийн чухал юм шүү дээ.
