Улсын дээд шүүхийн байранд коронавируст халдварын тохиолдол бүртгэгдсэн тул УОК-ын Шуурхай штаб, дүүргийн Онцгой комиссын Шуурхай штабын заавар, зөвлөмжийн дагуу 2021 оны дөрөвдүгээр сарын 16-наас 23-ны өдрийг дуустал тус шүүхийн шүүн таслах болон бусад үйл ажиллагааг хязгаарласан, зарим хэргийн шүүх хуралдааныг товлосон хугацаанд нь “zoom” ашиглан зайнаас явуулж байгаа.
Шүүх хуралдаан болохгүй байгаагаас үүдэн олон асуудал гарч буй талаар нийгмийн сүлжээнд яригдаад байгаа юм. Тодруулбал,
Монголын өмгөөлөгчдийн холбооны гишүүн Б.Мэргэн шүүхийн шийдвэрийг хүлээгээд суллагдаж чадахгүй байгаа яллагдагчид эрхээ зөрчүүлж байна хэмээн жиргэжээ. Тэрээр “Ковид гээд шүүхүүд нь ажиллахгүй. 461-т гэм буруутай нь тогтоогдоогүй байгаа 96 хүн ковидтой. Суллагдах боломж нь бүрдчихсэн хүмүүс шүүх ажиллахыг хүлээгээд л байж байдаг. 1 хоног ч илүү хоригдоно гэдэг аймшигтай хүний эрхийн зөрчил. Хэлээд явахаар хариуцах хүнгүй” хэмээн үзэл бодлоо илэрхийлсэн байна.
