Цэнгүүн & Төгс хоёрыг харсан хүмүүс нээрээ л тэнгэрийн хунтайж, лусын дагинатай зүйрлэн ярих юм гээч. Стиль имиджээ ч эрс өөрчилж ягаан үсээр гоёх болсон загвар өмсөгч яах аргагүй л Диснейн хүүхэлдэйн киноны лусын дагина Ариэлийг санагдуулам аж. Харин Цэнгүүний хувьд бол угаасаа ярилтгүй. Анх олны өмнө авьяасаа үзүүлэхдээ л тэнгэрийн хунтайж “гуншин”-г түүний нэрний өмнө өөрөөс нь ч асуулгүйгээр ард түмэн “аргамжчихсан”. Харин хос хоёроор сонин ихтэй. Учир нь сүүлийн жилүүдэд хүмүүс өөрсдийн амьдралынхаа сонирхолтой бичлэгийг сошиал орчинд байршуулан бусдад эерэг мэдээлэл түгээдэг хүмүүсийн тоо эрс нэмэгдэх болсныг анзаарсан л байлгүй дээ. Манай хоёр ч тэднээс яаж дутах вэ. Өөрсдийн өдөр тутмын амьдралын хэв маяг, мэдээ мэдээлэл, зөвлөгөө зэргийг өгдөг болоод даруй хэдэн сар өнгөрсөн.Youtube сувгаа л гэхэд зургаахан сарын өмнө нээж байсан тэднийг 13 мянган хүн дагадаг бөгөөд сонирхолтой яриануудаас нь бүрдсэн влогийг 113 мянган орчим хүн үзсэн байна гээд бод доо. Тэд аргагүй, энэ цагийн сонирхолтой, содон бас эерэг хандлагатай, түүчээлэгч хосын тоонд орохгүй гээд ч яах вэ.
