Миссүүдийн мисс гэж олноо хүндлэгддэг үзэсгэлэнт бүсгүй бол 1990 оны “Монголын сайхан бүсгүй” наадмын Алтан эрдэнийн өргөмжлөлт Н.Мөнхцэцэг билээ. Тэрбээр саяхан эмээ болсон тухай сайхан мэдээ сонсогдлоо. Газар дээр ганц хүүтэй түүний хувьд ачийн зулай үнэрлэж, эмээ болно гэдэг хэмжээлшгүй аз жаргал юм. Тийм ч учраас эмээ болсноороо бахархаж суугаа сураг сонсогдсон.
Хэдий эмээ болсон ч залуугийн сайхан төрхөө хадгалж, өнгө жавхаатай яваа Н.Мөнхцэцэг үе үеийн миссүүд дундаа аргагүй л нүнжигтэй харагддаг. Ер нь 1990-ээд оноос 2000-аад оны эхэн хүртэлх миссүүд чансаатай, зангарагтай, жинхэнэ миссүүд байсан гэлцдэг. Топ модель Э.Одгэрэл хүртэл Н.Мөнхцэцэгтэй нэгэн тэмцээнд ороод Алтан эрдэнээс мултарсан гэхээр түүнийг миссүүдийн мисс гэж авгайлах нь аргагүй биз. Үнэхээр ч одоо тэр үеийн зураг хөргийг харьцуулж харахад Н.Мөнхцэцэг шууд ялгарч харагддаг. Хөөрхөн царай, алаг нүдээрээ инээмсэглэх нь хэзээд гундахгүй бөгөөд үрчлээ нэмсэн шинж ч түүнд байдаггүй. Ямартай ч тогооч Н.Энхээгийн үеэл тэрбээр саяхны өдөр ийнхүү баяр хөөртэй явахад нь зураг дарж амжсан билээ.
